妝都未化就已經落莊/~\

捱左成年,尋日終於係我地第廿五屆新聯既年終會員大會,亦即係小旋所講既收X大會XD

尋日晨咁早就起左身去補習(因為居然呢日上晝先調到堂T_T),完左就搵鵬爺一齊攞booklet.由於排版問題,明明可以一張四版既booklet變左做每版一張A4 size= =乜料 囧

殺到馬松深,開房之後就do野(執場),臨急臨忙咁搞左一大輪,終於趕得切一點開波.

黎既人都唔少,起初真係有D淆底/~\因為若然當中有人搞事但我地handle唔黎就大煲= =

很好彩地,一切平穩過渡.前一日仲驚緊既所有可能狀況都無發生@@ good!

於是,第二十五屆新界聯校辯論學會正式收X,交俾第廿六屆既人繼續捱/~\今年我地學校派左三個中三既細路去做野,希望佢地係入面會過得好'enjoy'啦,hehe~~~

有D遺憾,由於時間尚早,所以我地無同新com食飯.一班熟人係M記頹頹地食個下午茶就算= =(但個時已經係下晝四點,隔左差唔多十個鐘先有野落肚呀陰公T_T)

熟人相聚總係特別開心.A姐係度分享佢係hku medicine入面遇到既趣事,笑到大家肚都痛.D professor好多都kai架/~\A姐扮佢地D神情仲要維肖維妙,正到爆.只可惜daisy無黎,唔知幾時先可以有機會笑多佢一次'惠康有狗'T_T

到最後,大家就真係散啦.睇住各人離去既身影,心入面真係有D百感交雜.雖然大家都可以聯絡到,但從今日起,我地之間既共通點就會越來越模糊.隔一年後,可能大家已經係唔同既大學奮鬥;十年後,再用二十五屆新聯聚集起黎,又會有幾多人到?

雖然我上年入新聯就真係半推半逼加糊里糊塗,但事後回想,我絕對唔後悔呢個決定.係新聯,我識到一班甚至比學校班人更fd既朋友.係入面學到既待人處事態度,雖然唔會令我真係八面玲瓏,但呢D經驗真係好寶貴.更重要既係,係大家同樣經歷過大大小小既難關後,呢D回憶就變得獨一無二,係屬於我地呢屆執委既回憶.對於呢份情誼,我好珍惜.

In contrast,我對於學校入面既'團契式關懷'就嗤之以鼻.即係點呢?你起初加入去個community個陣,大家都對你好熱情好好朋友,咁你咪以為好happy囉.過無耐,佢地同你既關係漸漸回到點頭朋友既程度,然後又好'熱情'咁歡迎新來者,對佢地小圈子內既人先熟D.當你被exclude在圈子外時,你會有乜感受?俾著你會唔會接受到一個人人都只係對你點頭say個hi既community,最後對你既關懷係好似做完summation咁增大N倍?sorry,我數口唔精,恕我無能力量化呢種關係.

因此,我慢慢已經識得點樣回應各位既'關懷'.放心,我真係好'關懷'你地架^^

十幾人團體互相之間既bonding,要比幾十人鬆散的黎又分佈不均既關係要更可靠,穩固.我又明白了^^

其實係想寫生日,但到而家先落筆= =

係八月三十號,小弟終於都十八歲lu.諗落時間又真係過得幾快.想當年仲係傻下傻下咁碌入黎迦密主恩,話咁快就去到中學既最後一年,要面對AL=v=唏噓呀

一到十二點,十幾個網友係MSN同我講生日快樂,場面壯觀@@點幾鐘時鵬爺講笑話不如下晝一齊食lunch,點知真係成行= ="雖然人唔多,不過都算係有人黎.

同鵬爺食飯前,原來小弟俾父母的左上中大行山= =" 父母:'阿仔,你生日囉喎,上中大行下啦!'我::’。。。。。。’終於行完山,告別阿爸阿媽,並食完一頓唔多好味既日本餐後,我地班友就去左影貼紙相,簡直低能囧.算,見在生日,就kai下啦.

接住落黎,我+小明+鵬爺落MK睇laughing gor= ="簡直係笑片黎既.吳鎮宇爆樽個幕真係笑到嘔泡.最尾一場槍戰,死剩laughing,然後接落電視劇,好野=v=唯一有少少印象既就係吳鎮宇同陳法拉飾演既呢對兄妹.個阿哥係就係無惡不作,但真係好錫個妹.實在好喜歡呢種明明係痛錫對方,之不過又唔肯講出口既情感^^

睇完戲,返到屋企食餐好飯,劈左D酒,食左個蛋糕,十八歲生日就過得七七八八lu.回想起呢個生日,本來呢個生日都係過得好平淡架啦,幸好有新聯班人肯幫我慶祝生日,的確好開心,thank you very much!

可惜既係,比較番以前既生日,十八歲既生日係某方面黎講都幾折墮= ="前兩年我低調左D,到生日個日係差唔多無人發覺既囧.因此我決定今年一星期前已經打鑼打鼓咁同人講我生日啦!但反應明顯麻麻= ="同我講聲happy birthday既竟然多數係網友,或者係玩辯論時識既人.係學校玩開個班?well...

我唔係故意想將兩批人一齊比較.但個問題係,我上年係團契識佢地個陣,佢地將我當作新朋友咁好好對待.我生日,佢地送埋蛋糕,生日卡,禮物,不知幾咁熱情.雖然我唔稀罕呢D野,但今年佢地既對待,實在令我不期然諗到自己係佢地心目中係乜地位= =當你對一個新朋友都親切過對個識左一年既fd時,你到底當佢係乜呢?莫非係新朋友都不如?呢D咁虛偽既行為,實在好難令我信任佢.

最後再一次多謝新聯既人,thx for giving me such a wonderful birthday!仲有三水,thx for you card^^

好,由於時間關係,小弟決定飛到下個topic,就係正式開學時發生既事= =

今日上堂,有成堂就俾miss吹水吹走左= =佢攞住一張evaluation form,上面有comment寫住係佢堂乜都學唔到= =而miss就叫我地搵到底係邊個寫既囧.最後實無人認頭架,咪不了了之囉.

之不過,實情佢呢個行為既目的係咩呢?無人可以肯定.會唔會係真係搵個學生出黎傾傾呢?又唔多似喎...佢有N咁多種方法搵,最低樁肯定係公開叫班上既同學交人= =呢點佢無理由唔知個喎.係一切華麗既言詞背後,會唔會係一個原因,要我地唔好再質疑佢個teaching method呢?首先,佢指出個學生唔鐘意老師,唔鐘意個教學方式,所以話學唔到野,係唔理智.就咁睇都幾合理呀?但點解唔可以係根本學生學唔到野,因此唔鐘意老師及其教學方式呢?然後,佢又話係大學會有更多教得唔好既professor,所以我地要學識自習.係呢段時間,要專注學業,唔好俾任何野打擾到,包括老師既質素...不過其實呢兩個point都唔係直接支持佢個目的,再者D point其實都幾weak...咁到底佢講呢番話想係有乜意義呢?= ="呢個真係一個'謎'.

中七一開始就咁精彩,以後都唔知點算T_T

放榜過左幾日,都係打下entry先,廢事又唔記得= =

話說個日我晨咁早番去學校,以教會名義做helper= =其實都係臨時先知做乜,但都無咩大問題既.

睇過一D關於放榜既資料,又等左一陣,戲肉終於黎啦.我同彭祥上去八卦下,負責叫D唔太好成績既人落去樓下教會個資源中心,希望幫到佢地搵學校---我自然係趁呢個機會八卦下D分別啦= =

原來今屆出左個9A,係學校咁多年黎第一次@@今次真係威lu.加個6A,仲有好幾個29分,又真係唔錯啵@@不過睇真D,今屆好似同往年唔同左.仲以為班同學仔會喊到唔清唔楚,但點知佢地好平靜.問番成績,原來勁人一堆,唔掂既人亦都一大批.所以雙方既結果都早預左,都唔駛爭咩原校lu=v=

而文科嘛,今年D人short鬼左= =八個25分或以上,七個去左ktc/hssc...痴線架囧!十八分都差D唔收呀!於是同往年一樣,文科又係爭餐死囧

係忙完一個上晝,一切都差唔多塵埃落定.番到黎既自然開心,番唔到黎既之後幾日就要辛辛苦苦搵學校/~\

老老實實,今次個成績究竟係好定唔好先?

對於學校黎講,呢個無異係豐收既一年.多左個人拔尖,又有9A,高分既人好似幾多,文科好強...一切都係利好消息.但首先,點解文科要走先?講到尾都係因為學校對於高考生支援不足,令佢地要另謀他就.學校出到勁人,但留佢唔住,咁仲值得誇口嗎?

此外,今年理科無論係maths group,bio group,收生分數都係低左.呢個情況反映左雖然勁人係多,但唔勁既人仲多.個SD大左,AL時老師難教左= =即使係我地個屆D人個個咁平均,而家既學業成績都勁diverse.老師教得辛苦,學生學得痛苦.何必呢?而家既學生水平更懸殊,對學校又係咪一件好事呢?

講到尾,到底學校既定位係點?到底佢係要有多D九優十優生,威餐飽;定係平均發展,雖然唔係個個都咁勁,但至少人人都有一定能力?雖然學校想有多D勁人係無錯,但當呢個趨勢持續落去,會唔會影響到學校最根本既價值觀呢?可能係我杞人憂天,但當問題開始浮現時,或者要改過已經遲啦...

雖然真係好夜,但我都想打埋呢篇entry先,以免日後無左呢件事=v=

前幾日我去左主恩堂一個三日兩夜既camp.雖然係教會camp,但我其實係靈性上無乜得著,反而係透過遊戲領略到D野.

例如係玩攞雞蛋同矇眼行山路既遊戲,我都體會到信任同伴既安全感.原來當你可以完全將一樣野交托係你身邊既partner度時,你真係會好放鬆.雖然呢D野係老生常談,但係遊戲到如此真切地感受到反而係第一次.而係呢個camp,我亦都同某D之前唔多熟既同學仔傾多左野.如果呢個camp主要目的係破冰,我諗都算成功...

係camp度返黎後無耐,三水就同我去左M記度食野吹水.原來我地有唔少相似之處.例如我地諗野都好critical,好抽離,同時亦都有D完美主義,做事有自己一套.我發現到自己既性格原來並唔係咁孤僻,因為其他人都有咁既特質.在別人身上發現自己,又係一件值得高興既事.

係談話中,三水叫我盡量將感受同人分享,唔好因為自己太快用理智駁斥哂自己就抑壓左自己情緒.此話甚難,誰能聽呢?=v=我覺得佢都無錯既,所以我就用我既網友黎試下.我指出左佢一直以黎都有既小問題,希望佢改下.點知俾佢串多幾獲= =之後我決定block左佢.可能有人以為我小氣,其實唔係.我識左佢唔短時間,但我地既關係只係停留係佢有野想講想問,我回應佢,佢講句thx就走佬既地步.我有試過多D了解下佢,想同佢再fd D.但可惜反應始終係冷淡.縱使我觀察到佢係待人接物方面有進步,但可惜我實在等唔黎.sorry,雖則我有時都幾理性,但我終究係個人.我不能再係一段沒回報既友誼上再投資落去啦.btw,呢個fd都就黎放榜,最後我想係度同佢講:good luck!祝福你!

besides,其實我一路都想係度寫多D關於自己既想法,但一直都唔知點表達出黎.我覺得自己係個好矛盾既人.我其實係好完美主義架,絕不能容忍錯誤,無論係別人還是自己既;不過係同時,我又會好粗心大意,做事好求其.個outcome係我做親乜,事後都會後悔+自責一番=v=攞黎賤

此外,我做野係好講求證據,no evidence no talk,甚至有時我會好stubborn.之不過相反地,我又會有D想法係好唔講邏輯同證據.例如我十分之痛恨D同學明明話讀書跟唔上進度,好唔掂,之後名列前芧= =我證明唔到佢呃我,但我好唔理性地覺得佢地好虛偽.為左保護自己,不知不覺地,我會做埋同佢地一樣既野,例如:

同學:Kenneth,暑假放左咁耐,溫書溫成點呀?

我:無呀,hea下hea下,溫得少少咋!(實情係我晨早已經preview左N課,pastpaper都做埋=v=)

又例如:

朋友(MSN中):Kenneth,做緊咩呀?

我:hea溫chem中.(其實又係preview+do pastpaper中= =)

再例如:

同學:唉!今次考試考得好差呀!

我:唉!我都係呀!大學無offer就死啦!(但實情我話差個D科無頭幾名都有頭十,咁都叫no offer就實在搏打個隻=v=)

我知自己咁做好on居,因為我呢D行為似係報復,但其實無咩意義;之不過我唔咁做,我度氣始終有D谷住.點解D人可以咁虛偽我唔可以?(直到呢句為止我都係缺乏任何證據=v=)

咁究竟我係個理性定感性既人呢?我只說我係個傻仔= ="

好多時我都有好多野想講.我想俾人知我係個咩既人,我俾佢地了解我.但三水講得好啱,我實在太擅於同自己溝通(因為咁溝通最有效率),反而會令我封住自己把口.我實在好希望會有人主動step up黎聽我呻聽我講,而唔係我講完一大輪野,佢地只係哦左聲,甚至no response.講堅,我知大把人都以為我淨係識食字+搞gag,但有冇人實在知我諗乜?無囉!

其實以上既point好易駁.咁你要人點對你,就先要點對人啦!exactly!正因為咁,我好少將以上既野同人講.因為我唔容許自己講埋D咁易駁斥既野=v=sorry!請容讓我不理性一下,野蠻一下!

七月四號係小弟既大日子XD唔係我成家立室,而係新聯既決賽@@

尋日我一早就撲去買俾顧問既紀念品.由於荷包乾塘,只能夠買四支頹筆= =十一點係大學站同鵬爺佢地集合之後就出發去中大.

c ho同jason晨咁早已經黎到中大set場.我地黎到之後都執得七七八八.CU個lecture theatre真係好大好靚><如果入到CU就好啦><由於執場唔係我工作,所以小弟基本上係行行企企,最多催下D評判黎.

之前十分驚梁家傑會甩底,好彩真係黎左,仲好準時添><佢黎既時候派左堆書籤俾我地,上面寫左佢MSN同facebook(咁young?= =")到左around兩點半,評判黎齊,會員學校都黎左一堆人,於是我地開始比賽.雖然遲左些少,但還可以接受.

季軍戰係st. rose對鄉中,辯題係講政府應唔應該派消費券.st. rose條主線都算醒目,明知消費券長期係無咩作用,所以就將呢樣野定義為俾零售業界捱到第四季度,市場好轉既措拖.作為正方,識得'懶'(慳番D論證責任)係幾著數既.呢個策略令到鄉中個主辯有D牛頭唔搭馬嘴,因為佢地擺到明預st. rose會講消費券既長期利益= =咁之後,之後st rose無視乘數效應同替代效應,死守住七十億掟落街業界一定接得住既底線 囧.可能因為free debate時st. rose過於暴燥失左分,最後以三比二僅敗,未能打破千年老四既宿命= =daisy身為鄉中人係超開心囉.咁抵佢咁happy既,話哂鄉中係佢一手一腳湊大架嘛XD

冠軍賽就係hssc對柏雨,講醫療旅遊.hssc,尤其是某朱姓辯員既叫座力的確勁.成堆人係冠軍戰前魚貫入場,差D爆棚 囧.不過呢場無想像中好睇.有D point聽落真係令人R頭.例如微創手術可以包入醫療旅遊一部分就= ="當你可以即日出院時,你仲點度假+shopping呢友方同學?=v=不過最後hssc都以三比二贏左個冠軍番黎.柏雨個楊詩彤攞best debator,都幾合理.

兩場比賽之後就係頒best debator奬+judge感謝狀既時侯.接落黎係final評判comment.小旋講得啱,兩場比賽入面,雙方既data都好充足,但分析數據既能力要再作改進.正方話XX百分比人贊成,所以辯題成立;反方話YY百分比人反對,所以辯題不成立.咁即係點呢?= =我地中學生思維能力之不足,係辯論場上充分地展現出黎.幸而透過辯論,我地可以慢慢地改善思維能力,免得上到大學俾人笑死= =

當作為MC既C浩宣佈比賽結束,明年再會時,新聯決賽正式完結.大家係度狂影相,超開心.我地一眾幹事亦難掩喜悅.捱左成年,終於有個美滿句號^^

仲記得當時入新聯都仲係傻下傻下咁.明明不擅辭令既我要做公關囉(其實我都唔明自己點解要選呢個位=v=),真係好大挑戰.run一個學會係好難既,尤其是新聯呢個咁大,仲要係純學生主辦既比賽.

大家睇比賽時,只係見到一個場,幾個辯員幾個judge,主席+計時員,然後開波.好多人可能以為一場比賽好易就搞得掂,但事實唔係咁.新聯本年度七十場比賽,真係場場皆辛苦.由主席到公關到賽務到總務,個個都要努力.呢一年黎,我都唔知有幾多次為場地,評判等事而苦惱.每次有問題出現時,我都覺得好慘.明明中六生應該要讀書架嘛,點解要咁折墮入新聯捱?但回望過去,呢一個個既難關都令我同我既伙伴成長不少.

小旋今日send左封信俾我地新聯,入面講既野令我好有同感@@佢寫到大家今年頂硬上搞好咁多場比賽既滿足感,係以後都好難再搵到既.無錯,相信係往後既人生,都好難再會有十三個滿腔熱誠既青年人,為同一個目標同理想而奮鬥.我亦都相信,唔係親自入新聯捱過一年既人,亦都唔會了解到我係比賽完滿結束後係幾咁滿足.

與此同時,我都諗通左D野.話說前排我覺得自己同學校既同學仔熟極有限,因此很灰.係鵬爺既'油色'之後,我作左D反思.其實同學們同我一樣,都同自己班fd有住獨特既經歷,所以先有咁既友誼.無論係團契,樂團,學生會等,佢地係上莊其間,都因其一齊走過既歷程而熟稔.所以,佢地同我唔熟,同我唔fd係正常.正如我入新聯,同校外既朋友所共同擁有既回憶都係獨一無二既.因此,我唔應該強求同佢地熟,同佢地fd.始終大家走唔同既路,我唔應該迫自己同佢地走埋一齊.君子之交淡如水,唔同佢地有爭拗已經算好.

決賽完結後,又係暑假時期.呢個係我一生中另一重要既暑假,唔可以浪費佢.加油努力!